Hverjir eru gjaldgengir þátttakendur?
Allir geta tekið þátt í Lífshlaupinu.

Hvað má skrá?
Alla miðlungserfiða eða erfiða hreyfingu sem stunduð er utan vinnutíma.
Til þess að fá einn dag skráðan þarf að hreyfa sig að lágmarki í 30 mínútur sem skipta má upp í nokkur skipti yfir daginn, t.d. 10 - 15 mínútur í senn. Hvað er miðlungserfið og erfið hreyfing? Svarið færðu undir "Hreyfiráðleggingar" hér til hliðar. 

Hvað má ekki skrá? 
Ekki er heimilt að skrá þá hreyfingu sem fellst í starfi einstaklinga. Til dæmis ef einstaklingur vinnur við það að bera út póst 8 klukkustundir á dag er honum ekki heimilt að skrá 8 klukkustundur í göngu fyrir þann dag.

Hvaða starfsmannafjölda á að gefa upp?
Skrá á þann starfsmannafjölda sem launadeild viðkomandi vinnustaðar hefur á launaskrá þegar keppni hefst, óháð starfshlutfalli. Ef einhverjir starfsmenn eru í orlofi eða námsleyfi á þeim tíma sem Lífshlaupið fer fram má draga þann fjölda frá. 

Framlag hvers og eins telur:
Í anda almenningsíþrótta er leikurinn byggður upp með það að markmiði að framlag hvers og eins telur, ef starfsmaður skráir einn dag þá telur það. 

Allt er betra en ekkert!

Hlutverk liðsstjóra felast í því að halda utan um liðið sitt á einn eða annan hátt. 

Liðsstjóri sér um að skrá liðið til þátttöku og hvetja sína liðsmenn til dáða. Liðsstjóri samþykkir liðsmenn.
Liðsstjóri er tengiliður sinna liðsmanna við umsjónarmenn átaksins.
Mikilvægt er að liðsstjóri komi öllum helstu upplýsingum frá umsjónaraðilum Lífshlaupsins áfram til sinna liðsmanna og sé sjálfur vakandi fyrir öllum þeim upplýsingum sem berast. 

Á vefnum er auðvelt að fylgjast með árangri mismunandi liða innan vinnustaðar (með því að smella á nafn vinnustaðarins) og því lítið mál að búa til innanhúskeppni samhliða. Vinnustaðir sem standa fyrir innanhúskeppni milli liða geta sett sínar eigin keppnisreglur ef þeir kjósa það.

Athugið að margir vinnustaðir t.d. innan sveitarfélaga hafa sömu kennitölu og sveitarfélagið. Ef viðkomandi vinnustaður vill keppa undir sínum merkjum er mikilvægt að nota aðra kennitölu þegar vinnustaðurinn er skráður til leiks (t.d. kennitölu eins starfsmanns).

Dæmi um útreikninga miðað við starfsmannafjölda
Vinnustaðurinn “Lukka” skráir sig til leiks í Lífshlaupið. 30 af 50 starfsmönnum Lukku hafa ákveðið aðtaka þátt. 
Þessir 30 starfsmenn eru mjög duglegir að hreyfa sig og þegar keppni lýkur hafa þeir hreyft sig í samtals 50.000 mínútur og 390 daga. 
En hjá vinnustaðnum “Lukku” starfa samtals 50 starfsmenn, og voru því 20 starfsmenn sem ekki tóku þátt. 

Þegar hlutfall daga og mínútna er reiknað út fyrir “Lukku” er því notast við heildar starfsmannafjöldi vinnustaðarins.  

Hlutfall daga: 390 dagar / 50 starfsmenn = 7,8 dagar að meðaltali á starfsmann

Hlutfall mínútna: 50.000 min / 50 starfsmenn = 1.000 minútur að meðaltali á starfsmann

Af þessu sést að sú tala sem á að skrá í “fjöldi starfsmanna” þegar vinnustaðurinn er skráður til leiks er HEILDARFJÖLDI STARFSMANNA SEM VINNUR Á VINNUSTAÐNUM en ekki bara sá fjöldi sem tekur þátt í Lífshlaupinu.

Dæmi um útreikninga á sætaröðun liða innan vinnustaða
Ef smellt er á hvern og einn vinnustað undir staða, má sjá öll liðin sem taka þátt fyrir viðkomandi vinnustað. Liðin raðast upp í röð eftir hlutfalli daga en hægt er að raða þeim upp eftir hlutfalli mínútna líka með því að smella á þátttökuhlutfall sem er lengst til hægri.

Undir vinnustaðnum “Lukku” eru skráð 3 lið, öll með 10 liðsmönnum. Liðið “Lukka 1” hefur hreyft sig samtals í 10.000 mínútur og 150 daga.
Hlutfall daga og mínútna reiknast þá svona:

Hlutfall daga: 150 dagar / 10 liðsmenn = 15 dagar að meðaltali á liðsmann

Hlutfall mínútna: 10.000 mínútur / 10 liðsmenn = 1.000 mínútur að meðaltali á liðsmann

Eftir þessum hlutföllum raðast svo liðin þrjú í sæti undir vinnustaðnum.

Af þessu sést að mjög mikilvægt er að allt sé rétt skráð svo að úrslitin verði rétt í lok keppninnar.

Hér finnur þú skráningarblöð sem prenta má út.

Hér er bréf sem vinnustaðir geta sent út til sinna starfsmanna vegna þátttöku

Bréf samstarfsfólk 2023.docx

Dagatal Lífshlaupsins