Við í LabbRabbhópnum höfum verið að rekast á stóra steina á rölti okkar undanfarið. Síðast rákumst við á steininn Lat í suðurhlíðum Kópavogs, en frásögn af honum finnst hjá Ferli á netinu. Áður fundum við tvo landamerkjasteina frá 1839 og svo sjóbarinn stein í Öskjuhlíð. Ég sendi ykkur mynd af Lötum, en ef þið viljið sjá hina steinana er ekkert mál að senda ykkur.

Hef undanfarin ár haldið utan um lið frá Félagi eldri borgara á Húsavík og annast skráningu á hreyfingu liðsmanna.
Hefur það alltaf gengið vel og verkefnið „Lífshlaupið“ verið eflandi og bætt hreyfingu flestra(fjöldi liðsmanna stundum farið á 7 tuginn) og
oftast höfum við náð góðum árangri og unnið til verðlaunum. Nú í ár baðst ég undan verkefninu og taldi tíma kominn á að aðrir tækju við,
hefur það verið í vinnslu og fólk verið að skrá sig inn hjá félaginu. En ég fékk áfram áskoranir frá sumum fyrrum liðsmönnum og að endingu
gaf ég eftir og ákvað ég að stofna nýtt lið með völdum liðsmönnum (að hámarki 25 liðsmenn „Félag eldri borgara Húsavík FEBHN - lið b“)
Hef ég haldið utan um það lið og annast skráningu liðsmanna. Verklag mitt er eins og undanfarin ár, við setjum upp áætlun fyrir hverja viku þar sem hver liðsmaður gefur upp sína hreyfiáætlun, ef einhver breyting verður fæ ég skilaboð þar um á Fb eða í SMS. Þetta hefur verið mjög hvetjandi og virkar vel á alla og t.d. ef einhver treystir sér ekki út í göngu eða annað leysir hann það t.d. með heimaleikfimi eða í versta falli með auka eldhúsverkum😊
Sem dæmi um áhuga liðsmanna eru 6 þeirra nú á Kanarý/Tenerife og hafa bara bætt í sína daglegu hreyfingu með göngu og pútti. Ég ásamt mínum göngufélaga erum mættir alla morgna (allt árið) fyrir kl 6,30 á upp hitaðan gervigrasvöllinn hér í bænum og göngum amk 5 km og endum á kröftugum „Mullers æfingum“ á eftir í 10 min. Einn liðsfélagi og sá harðasti (f.1946) fer flesta daga á Fjallið (fer á topp Húsavíkurfjalls, hæð um 420 m) og nú síðustu daga þegar snjór er orðinn töluverður bregður hann fyrir sig snjó-þrúum, og þá daga sem hann kemst ekki vegna veðurs bregður hann sér í langa stafagöngu eða á raffjallahjól. Margir í hópnum stunda fasta tíma í leikfimi, sundi og sundleikfimi, Boccia, göngu með styrktaræfingum í Íþróttahöllinni og að sjálfsögðu eru sumir sem taka fasta göngutúra. Flestir í hópnum eru að stunda þessa hreyfingu allt árið þó Lífshlaupið sé góð viðbótar hvatning.

Annars allt í góðu og kærar kveðjur til ykkar frá Húsavík
f.h. Liðs „Félag eldri borgara Húsavík FEBHN - lið b“

Egill Olgeirsson, liðsstjóri

Lífshlaupið er alveg stórskemmtilegt og mannbætandi og hentar hverjum sem er! Ég er með skrokk í sæmilegu standi en meðan Lífshlaupið stendur yfir þá leggir maður auðvitað meira á sig og styrkist því betur. Á þessum átstíma getur það samt verið svalt að hjóla og það í snjó, frosti og á svelli. Stundum er það bara ferlega skítkalt og strembið - en maður lætur sig hafa það meðan maður skröltir þetta og fært er! 🇮🇸🤗🚴‍♂️

-Ég var að senda ykkur mynd- Í Dalskóla er starfsmannahópnum skipt í tvo hópa eldri ( reyndir og kröftugir) á móti yngri ( ungir og sprækir). Inni á kaffistofu er búið að setja upp þrekhjól, róðravél og sippubönd og eru kaffitímar hér vel nýttir.