Verðlaunaafhending Lífshlaupsins fór fram í sal KSÍ við Laugardalsvöll í hádeginu í dag.

27.02.2017

Verðlaunaafhending Lífshlaupsins fór fram í sal KSÍ við Laugardalsvöll í hádeginu í dag. Fulltrúar frá vinnustöðum, grunn-, og framhaldsskólum tóku á móti sínum verðlaunum.

 

Góð þátttaka var í Lífshlaupinu í ár en rúmlega 16.000 þátttakendur voru skráðir til leiks á 428 vinnustöðum, í 23 grunnskólum og 10 framhaldsskólum. Þá voru skráðar 14,6 milljónir hreyfimínútna á keppnistímanum sem er 5% aukning frá 2016 og yfir 183 þús. dagar með lágmarksviðmiði sem er 9% aukning frá 2016. Þannig óhætt er að segja að þátttakendur séu að hreyfa sig bæði oftar og meira en undanfarin ár. 

Gaman er að sjá hversu margir vinnustaðir og skólar eru duglegir að taka þátt í verkefninu ár eftir ár. Segja má að Lífshlaupið sé orðið að vinnustaða-/skólamenningu á mörgum þessa staða, en vinnustaðir og skólar eru duglegir að skapa sínar eigin hefðir í kringum Lífshlaupið.

Þau fyrirtæki og þeir skólar sem höfðu ekki tök á því að vera með okkur fá verðlaunaplattann sendan til sín í næstu viku og myndir af verðlaunaafhendingunni eru komnar á á síðuna.

Um leið og við óskum sigurvegurum til hamingju með árangurinn, þökkum fyrir frábæra þátttöku og hvetjum alla til að halda áfram að hreyfa sig og nota vefinn til þess að halda utan um sína hreyfingu. Einstaklingskeppni Lífshlaupsins er í gangi allt árið og gefst þátttakendum kostur á að vinna sér inn brons-, silfur-, gull-, og platínumerki eftir að hafa náð ákveðnum fjölda daga í hreyfingu.

Næstu almenningsíþróttaverkefni á vegum ÍSÍ eru Hjólað í vinnuna 3.-23. maí og Sjóvá Kvennahlaup ÍSÍ 18. júní.