Verðlaunaafhending Lífshlaupsins 2019 fór fram í dag

01.03.2019

Fulltrúar frá vinnustöðum, grunn-, og framhaldsskólum tóku á móti sínum verðlaunum í hádeginu í dag á verðlaunaafhendingu Lífshlaupsins 2019 sem fór fram í sal KSÍ við Laugardalsvöll. Góð þátttaka var í Lífshlaupinu í ár  voru 17.139 þátttakendur í 1.508 liðum og voru alls 15.643.106 hreyfimínútur skráðar. 

Mætingin á verðlaunaafhendinguna í dag var mjög góð. Gaman er að sjá hversu margir vinnustaðir og skólar eru duglegir að taka þátt í verkefninu ár eftir ár með flottum árangri. Lífshlaupið er orðið að vinnustaða-/skólamenningu á mörgum þeirra staða sem skara fram úr og vinnustaðir og skólar eru duglegir að skapa sínar eigin innanhúshefðir í kringum Lífshlaupið.

Þau fyrirtæki og þeir skólar sem höfðu ekki tök á því að vera með okkur fá verðlaunaplattann sendan til sín í næstu viku og myndir af verðlaunaafhendingunnieru komnar á heimasíðu ÍSÍ

Um leið og við óskum sigurvegurum til hamingju með árangurinn, þökkum fyrir frábæra þátttöku og hvetjum alla til að halda áfram að hreyfa sig og nota vefinn til þess að halda utan um sína hreyfingu.