Ragnheiður Sveinbjörnsdóttir - "Í flestum keppnum skiptir mestu máli að fá fólk til að vera með"

22.02.2021

Ragnheiður Sveinbjörnsdóttir er umsjónakennari í 7. bekk í Húsaskóla, ofurhlaupari, landsliðskona og þriggja barna móðir.
Starfsfólk Almenningsíþróttasviðs ÍSÍ hefur tekið eftir því hvað hún er virk í verkefnum sviðsins og fékk fyrir skömmu símtal frá foreldra í Húsaskóla sem hringdi sérstaklega til að hrósa Ragnheiði fyrir að vera hvetjandi fyrir börnin og fá þau til að hreyfa sig meira. Þessi móðir á dóttur í 7. bekk í Húsaskóla sem hefur verið mjög dugleg að fara í sund alla morgna fyrir skóla til að hreyfa sig eftir að hafa fengið hvatningu frá Ragnheiði í tengslum við Lífshlaupið.

Starfsmaður ÍSÍ hitti Ragnheiði á skólalóð Húsaskóla fyrir helgi og spurði hana spjörunum úr.

Ragnheiður hefur sjálf náð einstaklega góðum árangri í utanvegahlaupum og hefur nýlega verið valin í landslið Íslands sem keppir á HM í utanvegahlaupum sem fer fram í Nóvember á þessu ári.
Ásamt því að vera glæsileg afrekskona sjálf virðist hún vera einstaklega fær í að hvetja aðra til þess að hreyfa sig meira. Þegar Ragnheiður var spurð út í það hvernig hún fer að því að hvetja krakkana í Húsaskóla til að vera svona virk tók hún sérstaklega fram að kennarar skólans eru allir að hjálpast að og hrósar hún skólanum fyrir að standa vel að öllu sem kemur að því að efla og auka hreyfingu hjá börnunum. Í skólanum er sérstakt heilsuteymi sem samanstendur af Ragnheiði, íþróttakennaranum David og Lilju Dögg kennara í fyrsta bekk, en þau hafa það hlutverk að halda utan um verkefni eins og Lífshlaupið. Þó þau leiði verkefnið innan skólans og hvetji samstarfsfólk og nemendur áfram eru flestir í skólanum virkir þátttakendur í verkefninu. Í miðju viðtali á skólalóðinni mættum við David íþróttakennaranum á gangi sem tók undir það sem Ragnheiður hafði sagt um skólann. Hann var hissa á því hvað allir í skólanum voru tilbúnir í þetta verkefni en hann tók það einnig fram að með þátttöku í Lífshlaupinu hefur „samfélag Húsaskóla komið saman“ („The whole family communtiy of Húsaskóli has come together“).
Eitt af markmiðum Lífshlaupsins er að vinnustaðir og skólar nái að efla starfsandan með því að taka þátt saman í þessu verkefni og greinilegt að það er að takast hjá Húsaskóla.
Í viðtalinu kom Ragnheiður inn á það að sem hluti af því að auka hreyfingu hjá nemendum er boðið upp á val á miðstigi. Börnin hafa val um ýmsa skemmtilega tíma eins og útiveru, hjólaval, hlaup og styrk o.fl. og hefur þetta verið gríðarlega vinsælt meðal nemenda.

Þó Ragnheiður virtist frekar vilja tala um skólann og börnin en sjálfa sig, fékk starsfmaður ÍSÍ að forvitnast aðeins um Ragnheiði sjálfa. Að eigin sögn er hún með mjög mikið keppnisskap en hún hefur hlaupið lengst 130 kílómetra í einni keppni sem fór fram á Kanaríeyjum í fyrra. Hún hóf sinn hlaupaferil um tvítugt en þá byrjaði það með „léttu skokki“ eins og hún orðaði það sjálf en hún fór fljótlega að æfa með skokkhóp ÍR sem hún var með í mörg ár áður en hún svo færði sig yfir í utanvegahlaupin. Á þessum tíma hefur Ragnheiður alið upp 3 stúlkur og er greinilega hvetjandi móðir líka en tvær af dætrum hennar hafa m.a. tekið þátt í WOW cyclothon með henni. Einnig þjálfar Ragnheiður í náttúruhlaupum og henni finnst greinilega mjög skemmtilegt að deila gleðinni sem fylgir hlaupunum með öðrum.
Ragnheiður tók það sérstaklega fram í lok viðtals að þó hún sé með mikið keppnisskap sjálf reynir hún að „beina því gagnvart réttu keppnunum – og í flestum keppnum skiptir mestu máli að fá fólk til að vera með“.

ÍSÍ þakkar Ragnheiði bæði kærlega fyrir að hafa gefið sér tíma í viðtal og fyrir að vera drifkraftur í samfélaginu þegar kemur að því að efla hreyfingu.