Frábær þátttaka í Lífshlaupinu 2026

04.03.2026

Í ár var ákveðið að tileinka febrúar Lífshlaupinu og átakið var ræst þann 1. febrúar sl. í nítjánda sinn í höfuðstöðvum Icelandair í Hafnarfirði.

Þátttakan var mjög góð. Á þessum fjórum vikum var heildarfjöldi virkra þátttakenda 21.175 sem er um 13,8% aukning frá 2025. Sé horft lengra aftur má sjá að þátttakan hefur aukist um 28,5% frá 2024, sem telst mjög jákvæð þróun og segja má að Lífshlaupið hafi tekist að virkja 5,43% þjóðarinnar til hreyfingar.

Skráð lið voru 1.725 og þátttakendur hreyfðu sig samtals 347.550 daga og 27.954.112 mínútur. Magnaður árangur!

Ef þið ýtið á yfirflokkana opnast úrslitin í pdf.

GRUNNSKÓLAR:

Í grunnskólakeppninni var keppt í 4 flokkum eftir fjölda nemenda í skólanum og aðeins er keppt um hlutfall daga eða flesta þátttökudaga hlutfallslega miðað við heildarfjölda nemenda. Í ár tóku alls 28 grunnskólar þátt sem er einnig bæting síðan síðast þegar 23 grunnskólar tóku þátt.

FRAMHALDSSKÓLAR:

Í framhaldsskólakeppninni eru keppnisflokkarnir þrír eftir fjölda nemenda í skólanum. Keppt er bæði um fjölda daga og fjölda mínútna hlutfallslega miðað við heildarfjölda nemenda í skólanum. Í ár tóku einungis 2 skólar þátt sem er veruleg fækkun frá síðasta ári þegar 8 skólar tóku þátt.

HREYSTIHÓPAR 60+:

Þessum flokki var bætt við 2024 og hefur verið virkilega vel tekið. Hreystihóparnir keppa einnig um hlutfall daga og mínútna.
Alls skráðu 44 hreystihópar sig til leiks sem er verulega aukning frá því í fyrra þegar 29 hreystihópar skráðu sig til leiks. Aldri þessa flokks var breytt úr 67+ í 60+ og líklegt er að það hafi haft eitthvað að segja.

VINNUSTAÐAKEPPNI LÍFSHLAUPSINS:

Virkir vinnustaðir í ár voru 543 en voru 492 í fyrra. Margir vinnustaðir hafa alltaf tekið þátt öll árin sem Lífshlaupið hefur farið fram og fjölmargir náð að stíga á verðlaunapall oftar en einu sinni. Í þessari keppni er keppt í hlutfalli daga og mínútna og verðlaunað er fyrir fyrstu 3 sætin í hvorum flokki.

ÍSÍ vill þakka öllum fyrir þátttökuna og sérstaklega öllum liðsstjórum fyrir samvinnuna og þeirra framlag við að hvetja samstarfsmenn sína til dáða. Þetta var árangursríkt Lífshlaup og við hlökkum til að sjá enn meiri aukningu á næsta ári.
ÍSÍ þakkar einnig styrktaraðilum kærlega fyrir einstaklega gott og skemmtilegt samstarf í skráningar og myndarleik. Styrktaraðilar í ár voru Mjólkursamsalan, Heilsa.is, Lemon, Primal Iceland, Skautahöllin í Laugardal, Skautahöllin á Akureyri, Klifurhúsið, World Class, Saunagus Reykjanes og Unbroken.

Sérstakar þakkir fær Andri Freyr, þáttarstjórnanda á Rás 2 fyrir sérlega gott samstarf í að koma upplýsingum um skráningar og myndarleik til þátttakenda alla virka daga á meðan átakið stóð yfir og Eygló Fanndal Sturludóttir, Íþróttamaður ársins 2025 og Erla Guðmundsdóttir "Heilsuerla" fyrir jákvæða umfjöllun um Lífshlaupið á samfélagsmiðlum.

Á næsta ári er von á uppfærðu og betra skráningarkerfi fyrir Lífshlaupið en fram að því er um að gera að nota núverandi Lífshlaupskerfi til að halda utan um hreyfinguna sína allt árið. Þannig er hægt að fylgjast með tölfræðinni inni í kerfinu sem getur virkað sem hvatning fyrir marga.

Takk fyrir þátttökuna og verið dugleg að hreyfa ykkur alla daga!

Myndir frá verðlaunaafhendingu má finna hér